குடிநீர் தேவையை பூர்த்தி செய்ய சிறுநீர் – விண்வெளி வீரர்கள் எதையெல்லாம் சாப்பிடுவார்கள்?

2025இல் நிலவுக்குச் செல்லவிருக்கும் விண்வெளி வீரர்களுக்கான புதிய தலைமுறை விண்வெளி உடையை நாசா அறிமுகம் செய்ததில் இருந்து விண்வெளிப் பயணம் குறித்த ஆர்வம் பலரையும் தொற்றிக்கொண்டது.

அமெரிக்க விண்வெளிப் பயணிகள் தற்போது அணியும் உடை 1981க்குப் பிறகு முழுமையாக மறு வடிவமைப்பு செய்யப்படவில்லை. இப்போது அறிமுகம் செய்திருக்கும் மாதிரி உடை பெண் விண்வெளிப் பயணிகளுக்கு கச்சிதமாகப் பொருந்துகிறது என்றும் அங்கீகாரம் கிடைத்தால் இதே வடிவமைப்பு ஆர்ட்டெமிஸ் III பயணத்தில் பயன்படுத்தப்படும் என்றும் கூறப்படுகிறது.

ஆர்ட்டெமிஸ் III திட்டத்தின் மூலம் கடந்த 50 ஆண்டுகளில் முதல் முறையாக மனிதர்கள் நிலவுக்குச் செல்ல இருக்கிறார்கள். இதெல்லாம் சேர்ந்துதான் விண்வெளியில் மனிதர்களின் தினசரி வாழ்க்கை எப்படி இருக்கும், அவர்கள் எப்படி சாப்பிடுவார்கள், என்ன சாப்பிடுவார்கள் என்பன போன்ற கேள்விகள் மீது மக்களுக்கு மீண்டும் ஆர்வம் பிறந்துள்ளது.

எனவே, பிபிசி ஃபுட்செயின் வானொலி நிகழ்ச்சியில் ஓய்வு பெற்ற நாசா விண்வெளி வீரர் நிகோல் ஸ்டோட் என்பவரிடம் இது பற்றிக் கேட்கப்பட்டது.

தனது நீண்ட பனிக்காலத்தில் இரண்டு முறை சர்வதேச விண்வெளி நிலையத்துக்குச் சென்ற ஸ்டோட் அங்கே மொத்தம் 100 நாள்கள் இருந்துள்ளார். விண்வெளிப் பயணத்துக்கு என்று சிறப்பாகத் தயாரிக்கப்பட்ட உணவை உண்டே அவர் அங்கு வாழ்ந்தார்.

அங்கு இருந்தபோது “உண்மையாக நான் பீட்சாவை அடிக்கடி நினைப்பேன்,” என்றார் ஸ்டோட்.

“மெல்வதற்கு ஏற்ற மொறுமொறுப்பான மேற்புறம், உருகும் பாலாடை, வெதுவெதுப்பான சாஸ் இவற்றோடு ஒரு நல்ல பீட்சா துண்டு எப்போதும் சிறப்பானது,” என்று நாக்கை சப்புக்கொட்டியபடியே சொன்னார் அவர்.

ஈர்ப்பு விசை இல்லாத சூழ்நிலைக்கு ஏற்றபடி விண்வெளிப் பயணத்திற்கான உணவு வகைகள் திட்டமிடப்படவேண்டும். சிந்திய துண்டுகள் மிதப்பதைத் தவிர்க்கவேண்டும் என்பதால் அங்கே ரொட்டி இருக்காது. அதற்குப் பதில் டார்டில்லாக்கள் எனப்படும் கதாபாத்திரம்கள் இருக்கும்.

“காலை உணவுக்கு மசித்த முட்டை சாப்பிடலாம். தேவை என்றால் சிறிய வகை ஆம்லெட்டுகள் சாப்பிடலாம்.”

சர்வதேச விண்வெளி நிலையத்தில் பல்வேறு நாடுகளைச் சேர்ந்த பணியாளர்கள் இருப்பார்கள். எனவே, அங்கே பள்ளி மாணவர்களைப் போல விண்வெளி வீரர்கள் தங்கள் உணவுகளை பறிமாறிக் கொள்வார்கள் என்கிறார் ஸ்டோட்.

“பகல் உணவுக்குப் பலவகை சூப்புகள் இருக்கும். பகலிலும் உங்களுக்குத் தேவையான அனைத்தையும் டார்ட்டில்லாவாக சுருட்டி சாப்பிடலாம். இரவு உணவுக்கு ஜப்பானிய காய்கறிகள் எனக்கு மிகவும் பிடிக்கும். அவை மிகவும் சுவையாக இருக்கும்,” என்கிறார் ஸ்டோட்.

சர்வதேச விண்வெளி நிலையத்தில் அனைத்துமே மிதக்கும் என்பதால் அங்கே தட்டோ, கிண்ணமோ கிடையாது.

அங்கே சாப்பிடும் உணவு, அவற்றின் எடையைக் குறைக்கும் வகையில் மிகவும் பதப்படுத்தப்பட்டதாக இருக்கும். உணவுப் பொருள்களில் இருந்து தண்ணீர் உறிஞ்சப்பட்டிருக்கும். சாப்பிடுவதற்கு முன்பாக, உணவை வெந்நீர், தண்ணீர் தெளிப்பானில் காட்டி ஈரமாக்கி உண்பார்கள்.

உணவுப்பொருள், பொதியில் வைத்தே வழங்கப்படும். அதையே அவர்கள் தட்டாகப் பயன்படுத்துவார்கள். இதற்காக சிறப்பாகத் தயாரிக்கப்பட்ட ஸ்பூனும் இருக்கும்.

“இந்த நீண்ட கைப்பிடி வைத்த ஸ்பூன் கொண்டு சோற்றை அள்ளி எடுக்கவேண்டும். பிறகு அதை கறியின் மீது கொண்டு வந்து போடவேண்டும். இதுதவிர இந்த மிதக்கும் உணவுகளையும் உண்ண வேண்டும்,” என்கிறார் ஸ்டோட்.

மிதக்கும் உணவு வகைகளை உண்பது மிகவும் கடினம். அது ஸ்டோட்டுக்கு எப்படி இருந்தது?

“இந்த மிதக்கும் உணவு என்பது ஒரு மகிழ்ச்சியான விஷயம். ஒருவருக்கு ஒருவர் உணவை வீசிக்கொள்வது, காற்றில் மிதக்கும் உணவை போய் விழுங்குவது எப்போதும் ஒரு விளையாட்டான விஷயம்.”

விண்வெளியில் இருக்கும்போது உடம்பில் நீர்ச்சத்து அளவைப் பராமரிப்பது மிகவும் முக்கியம். ஆனால், தண்ணீர் எங்கிருந்து வரும்?

பூமியிலிருந்து போகும்போதே விண்வெளி வீரர்கள் தங்களுடன் கொஞ்சம் தண்ணீரைக் கொண்டு செல்வார்கள். மீதி தண்ணீர் மறு சுழற்சி மூலமாக கிடைக்கும்.

விண்கலத்தின் எரிபொருள் செல்களில் இருந்து வரும் கழிவு நீர், ஈரப்பதம், சிறுநீர் ஆகியவை தண்ணீருக்கான மூல ஆதாரங்கள்.

இது உங்களுக்கு அருவருப்பாகத் தெரியலாம். ஆனால், நம்மில் பெரும்பாலானவர்கள் பூமியில் அருந்தும் தண்ணீரைவிட இங்கே வடிகட்டி வழங்கப்படும் தண்ணீர் தூய்மையானது என்கிறது நாசா.

மிதக்கும் உணவு என்னும் வேடிக்கை மட்டுமல்ல, ஊட்டச்சத்து என்ற சீரியசான பக்கமும் விண்வெளி உணவில் உண்டு.

விண்வெளிப் பயணம் மனித உடல் மீது ஏற்படுத்தும் தீவிர தாக்கத்தைச் சமாளிப்பதற்கு சரிவிகித உணவு வேண்டும்.

எடை குறைவு, எலும்புத் தேய்மானம் போன்ற பிரச்னைகளால் “விண்வெளியில் நமது உடல் மிக விரைவாக மூப்பு அடையும்,” என்று விளக்குகிறார் நாசாவின் முதன்மை ஊட்டச்சத்து வல்லுநர் ஸ்காட் ஸ்மித்.

“பூமியில் இருக்கும்போது உணவு உங்கள் வயிற்றில் ஒட்டுவது போல, விண்வெளியில் சரிவர ஒட்டாது. இதன் பொருள் என்னவென்றால், வயிறு நிரம்பும் முன்பாகவே வயிறு நிரம்பிவிட்டது என்று உங்கள் வயிறு உங்கள் மூளைக்குச் சொல்லும்.

எனவே, விண்வெளிப் பயணத்தின்போது ஆட்களுக்கு எடை குறையும். இதன் காரணமாக, எடுத்துக்கொள்ளும் உணவின் அளவு குறித்த தரவுகளைப் பதிவதற்காக ஐபேடில் ஒரு செயலி வைத்துள்ளோம்.”

எடை குறைவு தவிர, எலும்புத் தேய்மானம் போன்ற உடல்நலப் பிரச்னைகளும் உண்டு.

“மாதவிடாய் நின்ற பெண்களுக்கு ஏற்படுவது போல 10 மடங்கு வேகமாக விண்வெளி வீரர்களுக்கு எலும்புத் தேய்மானம் ஏற்படும்,” என்கிறார் ஸ்மித்.

எனவே, நுண் சத்துகள், மாவுச்சத்து, புரதம், வைட்டமின்கள், தாதுக்கள் அடங்கிய சரிவிகித உணவு உட்கொள்வதை உறுதி செய்வது உடல் நலனைப் பேணுவதற்கு முக்கியமானது என்று கூறும் ஸ்மித், இப்படி உணவு உட்கொள்வது விண்வெளி வீரர்களின் மன நலனையும் மேம்படுத்தும் என்கிறார்.

“ஒவ்வொரு முறை ஒரு விண்கலம் சர்வதேச விண்வெளி நிலையத்திற்குச் செல்லும்போதும், பழங்கள், காய்கறிகள், ஆரஞ்சு, ஆப்பிள், மிளகு, பெர்ரி போன்றவற்றைக் கொண்ட ஒரு சிறிய பாக்கெட்டை அனுப்பி வைக்கிறோம். அவை நீண்டகாலத்துக்கு வராது. உளவியல்ரீதியாக அவை நல்ல பலனைத் தரும்.”

ஒட்டுமொத்தமாகப் பார்க்கும்போது விண்வெளியில் உண்ணும் உணவு ஒப்பீட்டளவில் நாம் நினைப்பதைவிட மிகச் சிறப்பானது என்கிறார் ஸ்மித். ஸ்டோட்டும் இதை ஒப்புக்கொள்கிறார்.

“உணவு விஷயத்தில் விண்வெளியில் எனக்கு சலிப்பு ஏற்பட்டதே இல்லை,” என்கிறார் ஸ்டோட்.

சர்வதேச விண்வெளி நிலையத்திற்கு சரக்கு கொண்டு செல்லும் விண்கலங்களில் உணவுப் பொருள்களைக் கொடுத்தனுப்ப விண்வெளி வீரர்களின் குடும்பத்தினர் விரும்புவார்கள்.

ஸ்டோட்டின் கணவர் ஒருமுறை அவருக்கு லண்டன் நகரில் இருந்து வரவழைத்த கருப்பு சாக்லேட் பூசிய மிட்டாய் அனுப்பி வைத்தார். அவரோடு விண்வெளி நிலையத்தில் இருந்த பிற விண்வெளி வீரர்களுக்கு சில நேரங்களில் ஒயின், காலா மீன் போன்றவை அனுப்பி வைக்கப்பட்டுள்ளன. இப்படி வரும் உணவை அவர்கள் சகவீரர்களோடு பகிர்ந்துகொள்வார்கள்.

சில உணவு வகைகளுக்காக விண்வெளி வீரர்கள் ஏங்கும் நிலை ஏற்பட்டாலும் பூமிக்குத் திரும்பிய உடனே அவர்கள் அதை உட்கொள்ள முடியும்.

ரஷ்ய விண்வெளி வீரர் அலெக்சி ஓவ்சினின் 2016இல் பூமிக்குத் திரும்பியவுடன் அப்படித்தான் தர்பூசணிப் பழம் தரப்பட்டது.

எதிர்கால விண்வெளிப் பயணங்களுக்காக கனடா விண்வெளி முகமையோடு இணைந்து எதிர்கால உணவு அமைப்புகளை உருவாக்கத் திட்டமிட்டு வருகிறது நாசா. இந்தத் திட்டத்திற்கு டீப் ஸ்பேஸ் ஃபுட் சேலஞ்ச் என்று பெயரிடப்பட்டுள்ளது.

“இன்னும் புதிதாக பல விஷயங்கள் வரும் என்று எதிர்பார்க்கலாம்,” என்கிறார் ஸ்காட். எதிர்காலத்தில் விண்வெளி உணவு என்பது மாத்திரை வடிவத்திலோ, பஞ்சு போன்ற வடிவத்திலோ வரக்கூடும். அதில் கொஞ்சம் தண்ணீர் சேர்த்தவுடன் உண்ணும் வகையில் அது இருக்கக்கூடும் என்கிறார் அவர்.

(பிபிசி உலக சேவை ஆங்கில வானொலிவில் ஒலிபரப்பான ஃபுட் செயின் நிகழ்ச்சி ஒன்றை அடிப்படையாக கொண்டு எழுதப்பட்ட செய்தி இது)

சமூக ஊடகங்களில் பிபிசி தமிழ்: