Press "Enter" to skip to content

24 நாடுகள் பங்கேற்கும் ஐரோப்பிய கால்பந்து போட்டி நாளை தொடக்கம்

உலக கோப்பையை போலவே ஐரோப்பிய கோப்பை கால்பந்து போட்டியும் 4 ஆண்டுகளுக்கு ஒரு முறை நடைபெற்று வருகிறது.

ரோம்:

உலக கோப்பை கால்பந்து போட்டிக்கு அடுத்த மிகவும் பிரசித்தி பெற்றது ஐரோப்பிய கோப்பை போட்டியாகும்.

உலக கோப்பையை போலவே ஐரோப்பிய கோப்பை கால்பந்து போட்டியும் 4 ஆண்டுகளுக்கு ஒரு முறை நடைபெற்று வருகிறது.

“யூரோ” கோப்பை என்று அழைக்கப்படும் ஐரோப்பிய கால்பந்து சாம்பியன்ஷிப் போட்டி 1960-ம் ஆண்டு பிரான்சில் முதல் முறையாக நடந்தது. இதில் சோவியத் யூனியன் 2-1 என்ற கோல் கணக்கில் யூகோசுலாவியாவை வீழ்த்தி முதல் ஐரோப்பிய சாம்பியன் ஷிப் பட்டத்தை கைப்பற்றியது.

இதுவரை 15 யூரோ கோப்பை போட்டி நடந்துள்ளது. இதில் ஜெர்மனி (1972, 1980, 1996), ஸ்பெயின் (1964, 2008, 2012) ஆகிய அணிகள் அதிகபட்சமாக தலா 3 முறை சாம்பியன் பட்டம் பெற்றுள்ளன.

பிரான்ஸ் 2 தடவை (1984, 2000) கோப்பையை வென்றுள்ளது. சோவியத் யூனியன் (1960), இத்தாலி (1968), செக்குடியரசு (1976), நெதர்லாந்து (1988), டென்மார்க் (1992), கிரீஸ் (2004), போர்ச்சுக்கல் (2016) ஆகிய நாடுகள் தலா ஒரு முறையும் சாம்பியன் பட்டம் பெற்றுள்ளன.

கடைசியாக யூரோ கால்பந்து போட்டி 2016-ம் ஆண்டு பிரான்சில் நடந்தது. இதில் போர்ச்சுக்கல் கோப்பையை கைப்பற்றியது. 16-வது ஐரோப்பிய கால்பந்து போட்டி கடந்த ஆண்டு நடைபெற வேண்டியது. கொரோனா நச்சுநுண்ணுயிர் (வைரஸ்) பாதிப்பு காரணமாக இந்த போட்டி ஒரு ஆண்டுக்கு தள்ளி வைக்கப்பட்டது.

இந்த நிலையில் 16-வது ஐரோப்பிய கோப்பை கால்பந்து போட்டி நாளை (11-ந்தேதி) தொடங்குகிறது. ஜூலை 11-ந்தேதி வரை ஒரு மாத காலம் இந்த போட்டி நடக்கிறது.

யூரோ கோப்பை போட்டியில் மொத்தம் 24 நாடுகள் பங்கேற்கின்றன. அவை 6 பிரிவாக பிரிக்கப்பட்டுள்ளன. ஒவ்வொரு பிரிவிலும் இடம் பெற்றுள்ள அணிகள் வருமாறு:-

குரூப் ஏ:- துருக்கி, இத்தாலி, வேல்ஸ், சுவிட் சர்லாந்து.

குரூப் பி:- டென்மார்க், பின்லாந்து, பெல்ஜியம், ரஷியா.

குரூப் சி:- நெதர்லாந்து, உக்ரைன், ஆஸ்திரியா, வடக்கு மாசி டோனியா.

குரூப் டி:- இங்கிலாந்து, குரோஷியா, ஸ்காட்லாந்து, செக்குடியரசு.

குரூப் இ:- ஸ்பெயின், சுவீடன், போலந்து, சுலோ வாக்கியா.

குரூப் எப்:- அங்கேரி, போர்ச்சுக்கல், பிரான்ஸ், ஜெர்மனி.

இத்தாலி தலைநகர் ரோமில் நாளை நடைபெறும் தொடக்க ஆட்டத்தில் ‘ஏ’ பிரிவில் உள்ள துருக்கி- இத்தாலி அணிகள் மோதுகின்றன. இந்த ஆட்டம் இந்திய நேரப்படி நள்ளிரவு 12.30 மணிக்கு தொடங்குகிறது.

ஒவ்வொரு அணியும் தங்கள் பிரிவில் உள்ள மற்ற அணிகளுடன் தலா ஒருமுறை மோத வேண்டும். 6 பிரிவிலும் முதல் 2 இடங்களை பிடிக்கும் அணிகள் 2-வது சுற்றுக்கு முன்னேறும். ஒவ்வொரு பிரிவிலும் 3-வது இடத்தை பிடிக்கும் அணிகளில் சிறந்த 4 அணிகளும் 2-வது சுற்றுக்கு முன்னேறும்.

வருகிற 23-ந்தேதி வரை லீக் ஆட்டங்கள் நடக்கிறது. 2-வது சுற்று ஆட்டங்கள் 26 முதல் 29-ந்தேதி வரையிலும், கால் இறுதி ஆட்டங்கள் ஜூலை 2 மற் றும் 3-ந்தேதிகளிலும், அரை இறுதி 6 மற்றும் 7-ந்தேதி களிலும் நடக்கிறது. இறுதி போட்டி ஜூலை 11-ந்தேதி லண்டனில் நடக்கிறது.

யூரோ கோப்பை போட்டிகள் லண்டன் (இங்கிலாந்து), ரோம் (இத்தாலி), பகு (அசர்பெய்ஜான்), முனிச் (ஜெர்மனி), செயின்ட் பீட்டர்ஸ் பர்க் (ரஷியா), ஆம்ஸ்டர்டாம் (நெதர் லாந்து), புகாரெஸ்ட் (ருமேனியா), புடாபெஸ்ட் (அங்கேரி), கோபன்ஹேகன் (டென்மார்க்), கிளாஸ்கோ (ஸ்காட்லாந்து), செவில்லி (ஸ்பெயின்) ஆகிய 11 நகரங்களில் போட்டி நடக்கிறது.

லண்டன் வெம்பர்லி மைதானத்தில் இறுதிப்போட்டி, 2 அரை இறுதி, 2-வது சுற்று ஆட்டம் மற்றும் லீக் ஆட்டங்கள் நடக்கிறது.

ஏற்கனவே வென்ற நாடு கோப்பையை வெல்லுமா? புதிய அணி சாம்பியன் பட்டம் பெறுமா? என்ற ஆவலுடன் ரசிகர்களால் எதிர்ர்க்கப்படுகிறது. இதில் விளையாடும் அனைத்து நாடுகளும் திறமையானது. இதனால் இந்த போட்டி தொடர் விறுவிறுப்பாக இருக்கும்.

ஐரோப்பிய கால்பந்து போட்டி சோனி டெலிவி‌ஷனில் நேரடியாக ஒளிபரப்பப்படுகிறது.

Related Tags :

[embedded content]

Source: Maalaimalar

More from விளையாட்டுMore posts in விளையாட்டு »