Press "Enter" to skip to content

‘தி இந்து’ நாளிதழுக்கு பாரதி எழுதிய ஆங்கில கடிதங்களை பாரதி கால தமிழில் மொழிபெயர்த்தவர் ஆ.இரா.வேங்கடாசலபதி- மேற்குவங்க முன்னாள் ஆளுநர் கோபாலகிருஷ்ண காந்தி புகழாரம்

image

மகாகவி பாரதியார் ‘தி இந்து’ நாளிதழுக்கு ஆங்கிலத்தில் எழுதிய கடிதங்களை, பாரதி கால தமிழிலேயே மொழிபெயர்த்த சிறப்புக்கு உரியவர் ஆ.இரா.வேங்கடாசலபதி என்று மேற்குவங்க முன்னாள் ஆளுநர் கோபாலகிருஷ்ண காந்தி தெரிவித்தார்.

வரலாற்று ஆய்வாளர், எழுத்தாளர், மொழிபெயர்ப்பாளர், கல்லூரி பேராசிரியர் என பன்முகதிறன் கொண்ட ஆ.இரா.வேங்கடாசலபதியின் பொன்விழாவை கொண்டாடும் வகையில், காலச்சுவடு அறக்கட்டளை, கடவு, ‘தி இந்து – லிட் ஃபார் லைஃப்’ ஆகியவை இணைந்து 2 நாள் கருத்தரங்கை நடத்துகிறது. ‘விரிவும் ஆழமும் – ஆ.இரா.வேங்கடாசலபதி பங்களிப்புகள்’ என்ற தலைப்பிலான இந்த கருத்தரங்கின் தொடக்கவிழா சென்னை கோட்டூர்புரம் அண்ணா நூற்றாண்டு நூலக அரங்கில் நேற்று நடைபெற்றது.

கருத்தரங்கை மேற்குவங்க முன்னாள் ஆளுநர் கோபாலகிருஷ்ண காந்தி தொடங்கிவைத்தார். அவர் பேசியதாவது:

இயல்பிலேயே கற்கும் ஆர்வம் அதிகம் உடையவர் வேங்கடாசலபதி. அதனால்தான் சிறந்த வரலாற்று ஆய்வாளராகப் புகழ்பெற்றுள்ளார். ‘பாரதி கருவூலம்’மகாகவி பாரதியார் ‘தி இந்து’ஆங்கில நாளிதழுக்கு ஆங் கிலத்தில் எழுதிய கடிதங்கள், பாரதியின் எழுத்துகள் தொகுப் பில் இல்லை. அவ்வாறு தொகுக்கப்படாத பாரதியின் எழுத்துகளை தொகுத்த பெருமை வேங்கடாசலபதியைச் சாரும். பாரதி ஆங்கிலத்தில் எழுதிய அந்த கடிதங்களை அவர் தற்போது தமிழில் மொழிபெயர்த்து ‘பாரதி கருவூலம்’ என்ற நூலாக வெளியிட்டுள்ளார். அவர் எழுதிய நூல்களிலேயே எனக்கு பிடித்த நூல் அதுதான்.

பாரதியின் ஆங்கிலக் கடிதங்களை, அவர் காலத்து தமிழிலேயே மொழிபெயர்த்ததால், பாரதியே தமிழில் எழுதியதுபோல இருந்தது அந்த நூல். அவ்வளவு சிறப்பாக மொழிபெயர்த்து இருந்தார் வேங்கடாசலபதி. நிறுத்தக்குறிகளும் ஒரு மொழிதான். அதை சரியான இடத்தில் பயன்படுத்தி, சரியான பொருளை கொடுக்கச் செய்வதில் சிறந்தவர்.

இவ்வாறு அவர் கூறினார்.

முன்னாள் துணைவேந்தர் வே.வசந்திதேவி பேசும்போது, “தற்போது பெரும்பாலான பள்ளிகளில் வரலாற்றுப் பாடம் இல்லை. மாணவர்கள் வரலாற்றுப் பாடம் கற்க வேங்கடாசலபதி போன்ற வரலாற்று ஆய்வாளர்கள் முயற்சி செய்ய வேண்டும்” என்றார்.

‘தி இந்து’ குழும இயக்குநர் நிர்மலா லஷ்மண் பேசும்போது, “வேங்கடாசலபதியின் வயது 50 ஆக இருந்தாலும், 100 வயதுக்கான அறிவையும், அனுபவத்தையும் பெற்றவர். இவரது எழுத்தும், ஆராய்ச்சியும் 100 ஆண்டுகளைத் தாண்டி தொடர வேண்டும்” என்றார்.

நிகழ்ச்சியில் வரலாற்று ஆசிரியர் ராமச்சந்திர குஹா, வரலாற்று ஆய்வாளர் நாத் ராகவன், கர்னாடக இசைக் கலைஞர் டி.எம்.கிருஷ்ணா, முகம் மாமணி உள்ளிட்டோர் கலந்துகொண்டனர்.

இன்று 2-ம் நாள் அமர்வுகள்கருத்தரங்கின் 2-ம் நாள்அமர்வுகள் இன்று நடைபெறுகின் றன. காலை 8.30 மணிக்கு தொடங்கி மாலை வரை தொடர்ந்து பல்வேறு அமர்வுகளில் பல ஆளுமைகள் உரையாற்றுகின்றனர். இரவு 7.30 மணிக்கு தொடங்கும் நிறைவு விழாவில் ஆ.இரா.வேங்கடாசலபதி ஏற்புரை நிகழ்த்துகிறார்.

Source: The Hindu

More from செய்திகள்More posts in செய்திகள் »
More from தமிழகம்More posts in தமிழகம் »
Mission News Theme by Compete Themes.